شو بتقتل حالك حتى تخلي سيارتك جديدة بتنظفها وبتلمعها،
وكل شي سنتين بتفكر تطرش بيتك لترتاح نفسيتك،
وعلى الأعياد بتشتري تياب جداد الك ولولادك لتحس بالفرح والسعادة،
لانو في شي من جوا بيقلك
انو الأشياء الجديدة بتغير المزاج…
بس انتبه،
حتى قلبك بحاجة انو تهتم فيه، وتحافظ على صحتو لانو مع الوقت بيعتق،
و هيدا اغلى قطعة بجسمك،
كرمال هيك في كتير ناس بتمارس الرياضة والركض حتى تجدد الدم والحياة فيه .
كرمال هيك ، مهمتك الأساسية اليوم تحافظ عليه وتخليه ينبض بالفرح والسعادة…
يعني تعلمو انو رغم كل الوجع والخذلان يللي عانيت منو من وجود بعض الأشخاص السلبيين والنكدين بحياتك ، الأمل بعدو موجود انك تلاقي أشخاص إيجابية يدعموك، ويقدروك،
وانو لازم قلبك ينبض بقوة قدام كل نجاح بتحققو رغم وجود ناس ما بيعترفولك بقدراتك، وحتى ال like ما عم يقدروا يكبسوا عليها، اد ما قلبهم قاسي وبيخافوا منك لأنك متفوق عليهم،
رغم تواضعك الزائد…
ونصيحة…قوي قلبك وهجوم، يا بتوصل عل حرية ،
يا بتوصل على النصر…
ويسعد مساك…
د.ريتا السلوى عطالله
