كتبت الدكتورة ريتا السلوى عطالله صاحبة موقع “كوين نيوز” الإخباري

القصة مش سهلة…

بتعرف مش سهلة، بهل إيام يللي وصلنالها، انك تتصرف كإنسان وترفض انو :
ـ تفتخر متل الأسد وتكون سيد، وتسيطر على الكل بإسم قانون الغاب.
– تطلع من تمك اشياء وكلمات سامة متل الحية تلبك حياة يللي حواليك.،
– تترك الكل يحلبوك متل البقرة، من دون أي إستئذان، ويستفيدوا من أغلى ما عندك من دون ما يقدمولك أي اهتمام أو احترام أو كلمة حلوة بالمقابل.
– تكون متل الدب يللي بيدعس على كل يللي قدامو، حتى يوصل لهدفو.
– تكون متل الحمل الوديع تسمع الإهانات والمسبات والفلسفات والفزلكات والإنتقادات ،وما ترد، لأنك مش حابب تفتعل المشكل، أو لأنك متاكد انو شو ما حكيت وبررت ما رح تلاقي الآذان الصاغية.
-تأكل متل الحوت كل يللي حواليك، مين ما كانوا، بس لتسد جوعك للشهرة والمركز يللي بيعجب الكل وبيحميك.
– تحور الحقيقة متل الثعلب وتستغلها لمصلحتك ساعة اللزوم.
– تترك الخوف يحولك كل لحظة للشكل يللي بيعجب الكل ،وبيحميك متل الحرباية.

يا ريت فيك تكون متل الدودة، يللي لما بتوصل لأخر نفس ،بتوعا لقوة
واهمية الحياة ،وبتتحول لفراشة بتلون الدنيا بجمالها.

فينا نكمل…
بس حبيت ذكر حالي وذكركن ،انو الأنسانية هي اكبر نعمة، وما نترك صعوبة ومشاكل الحياة انو تحولنا.

د. ريتا السلوى عطالله
صاحبة موقع “كوين نيوز” الإخباري