كتبت الدكتورة ريتا السلوى عطالله تحت عنوان:

،Bonne rentrée les élèves…

اليوم، هني ورايحين ولادكم على مدارسهم، ضروري تطلعوا منيح بعيونهم،
وتقولولهم ببداية هل عام الدراسي،
قداي انتو فخورين فيهم تيقدروا يطلعوا كل طاقاتهم وأفضل ما عندهم.

علموهم،
انو الولد النايم على الطاولة منو تلميذ كسلان، هيدا ببساطة يمكن تعبان او نعسان لانو يمكن عم يضطر يشتغل بالليل ليساعد اهلو بالقسط المدرسي.

قولوهم انو الولد يللي بيرسم على الطاولة هوي مش غبي أو مش فهمان ويمكن يكون مشروع فنان.

غرسولهم بعقولهم انو ما في ولد مش ذكي بس في ولد عندو ظروف وعم يتألم وما حدا فيه دريان.

ازرعولهم بنفوسهم وباللاوعي تبعهم انو النجاح والتفوق منو ابدا بالعلامات ، وانو العلامة هيي مجرد رقم، والنجاح انك تكون انسان قادر توقف حد خيك الإنسان بازماته.

انصوحهم انو الحياة هي المدرسة الحقيقية يللي بتطعمينا كفوف وبتعطينا دروس لنقدر نعيش بمجتمع فاسد ، نحنا وياهم بدنا نغيرو و نصلحو لنبني لبنان جديد، لبنان الحلو يللي بيشبه وجوه ولادنا الأبرياء.

عام دراسي موفق للجميع…

ريتا السلوى عطالله