شو في ورا الكواليس؟
شو في ورا الكواليس؟
نيكول_صدقة
دايماً منسأل هالسؤال؟؟ ودايماً منحب ندخل جوات الكواليس لنشوف حقيقة الإشيا، مش اللي منشوفا خلال العرض…
بكل عمل مسرحي بكون فيه ( المؤلف/ المخرج/ الممثلين /ابطال العمل/ الضحية/ المسبب / المشاهد/المكان/الزمان)… وغيرن، كل هول مجموعين مع بعضن بكملو العمل… متل الحياة نفسا فيا شوي من كل شي لتكمل… بس بكل محل في مسرحية مختلفة عن التاني، مرات منكون نحنا ع ”خشبة” المسرح، ومرات منكون آخدين دور المشاهد، وحسب الدور اللي منكون انحطينا فيه منفتش ع اللي موجود خلف الكواليس،،،
أولكن شو موجود؟؟
يمكن موجود الحقيقة، حقيقة الأشخاص ، هويتن، مواهبن، قدراتن، مين هنّي… عكس اللي منشوفن ع المسرح لابسين ادوار يمكن ما بتشبهن، منن عم بمثل دور الضحية، ومنن حاملين البطولة هدية، ومنن ادوارن اقل ما فيا ثانوية… والمشاهد هون بيحكم ع اللي بشوفو بلا ما يفتش ع التفاصيل المخفية… لأن هيك اتعود… وقلال اللي بدورو ع اللي مخبا بين الأسطر وأحرف الأبجدية…
يمكن موجود التعب، تعب الناس اللي حضرت وتعبت وسهرت الليالي..يمكن موجود الخوف، التردد… يمكن موجودة الفرصة الضايعة.. وفي ألف يمكن ناطرا ع العتبة وما الا جواب…
بس الاكيد انو ع خشبة الحياة بتختلف الادوار ، مين اللي عم بأدي دور تمثيلي ومين عايش حقيقة بلا تمثيل .. بلا أدوار.. بإيامنا الحالية صار من النادر نقدر نميّز. بتحس معظم الناس صارت عم تلعب أدوارا باتقان وذكا وع شوي بتصدق انو هيدي هويتن الحقيقية… ويمكن ببعض الاوقات هني بصدقو حالن لدرجة بينسو هنّي مين وبعيشو الدور وبيتقمّسو وبصير من الصعب يطلعو منّو..
للأسف هالفئة من الناس عايشة بالكذبة … ويا خوف!! من الحقيقة لمّا توعا وتكسّر قيود الكذبة وتزلزلا!! وبوقتا شو في جبال رح تنهار ويبين شو مخبا وراها… وشو في شمس رح تسطع ويبين النور من خلالا..وشو في ”حجار رح تحكي” وشو في هنّي مش هنّي .. وحتى انت يمكن تكون مش انت..
خلّي عينك عَ اللي #ورا_الكواليس
